غالب: ہزاروں خواہشیں ایسی کہ ہر خواہش پہ دم نکلے

مرزا اسد اللہ بیگ خاں غالب (1797–1869)²

پس منظر

یہ مرزا غالب کی سب سے زیادہ پڑھی اور گائی جانے والی غزلوں میں سے ہے اور اس کا مطلع ضرب المثل بن چکا ہے¹۔ تیسرے شعر میں حضرت آدمؑ کے جنت سے نکلنے کی روایت کو بنیاد بنا کر شاعر اپنے محبوب کے کوچے سے رسوا ہو کر نکلنے کا ذکر کرتا ہے۔ پانچویں شعر میں وہ شوخی سے کہتا ہے کہ محبوب کو خط لکھوانا ہو تو اسی سے لکھوائے، اور مقطع میں واعظ پر لطیف طنز ہے۔

غزل

ہزاروں خواہشیں ایسی کہ ہر خواہش پہ دم نکلےبہت نکلے مرے ارمان لیکن پھر بھی کم نکلے

ڈرے کیوں میرا قاتل کیا رہے گا اس کی گردن پروہ خوں جو چشم تر سے عمر بھر یوں دم بدم نکلے

نکلنا خلد سے آدم کا سنتے آئے ہیں لیکنبہت بے آبرو ہو کر ترے کوچے سے ہم نکلے

بھرم کھل جائے ظالم تیرے قامت کی درازی کااگر اس طرۂ پر پیچ و خم کا پیچ و خم نکلے

مگر لکھوائے کوئی اس کو خط تو ہم سے لکھوائےہوئی صبح اور گھر سے کان پر رکھ کر قلم نکلے

ہوئی اس دور میں منسوب مجھ سے بادہ آشامیپھر آیا وہ زمانہ جو جہاں میں جام جم نکلے

ہوئی جن سے توقع خستگی کی داد پانے کیوہ ہم سے بھی زیادہ خستۂ تیغ ستم نکلے

محبت میں نہیں ہے فرق جینے اور مرنے کااسی کو دیکھ کر جیتے ہیں جس کافر پہ دم نکلے

کہاں مے خانہ کا دروازہ غالبؔ اور کہاں واعظپر اتنا جانتے ہیں کل وہ جاتا تھا کہ ہم نکلے

مشکل الفاظ

• دم نکلے: جان نکل جائے؛ کسی چیز کی شدید چاہت
• ارمان: آرزو، دل کی خواہش
• چشم تر: آنسوؤں سے بھیگی آنکھ
• دم بدم: لگاتار، ہر لمحہ
• خلد: جنت، بہشت
• بے آبرو: بے عزت، رسوا
• قامت کی درازی: قد کی لمبائی
• طرۂ پر پیچ و خم: بل کھاتی ہوئی زلف
• جام جم: ایرانی بادشاہ جمشید کا افسانوی پیالہ جس میں دنیا کا حال دکھائی دیتا تھا
• خستگی: تھکن، شکستہ حالی
• خستۂ تیغ ستم: ظلم کی تلوار سے زخمی
• واعظ: وعظ و نصیحت کرنے والا